hama-jihat meri talab jis ki misal ab nahin

hama-jihat mirī talab jis kī misāl ab nahīñ

tirā ḳhayāl hai magar apnā ḳhayāl ab nahīñ

shauq kā bahr-e-be-karāñ mahv-e-sukūt-e-jāvedāñ

is meñ na koī josh ab is meñ ubaal ab nahīñ

ġham kī zamīñ pe āsmāñ baaqī rahā na ai miyāñ

dil kī ye sogvāriyāñ rū-ba-zavāl ab nahīñ

ab na harīm-e-nāz se hogā tulū āftāb

qurb-e-jamāl to gayā lutf-e-visāl ab nahīñ

duur hai rah habīb kī baat ye hai nasīb kī

jiinā muhāl ho gayā marnā muhāl ab nahīñ

raqs-kunāñ hai vaañ havas us pe rahī na dastaras

husn-e-malīh sākin-e-shahr-e-jamāl ab nahīñ

tere karam pe jī rahī kab se hai merī kaj-ravī

koī javāb ab nahīñ koī savāl ab nahīñ

le ke na.ī na.ī ġhazal aa hī ga.e 'farīd' ab

sun ai charāġh-e-anjuman terā zavāl ab nahīñ

hama-jihat meri talab jis ki misal ab nahin

tera KHayal hai magar apna KHayal ab nahin

shauq ka bahr-e-be-karan mahw-e-sukut-e-jawedan

is mein na koi josh ab is mein ubaal ab nahin

gham ki zamin pe aasman baqi raha na ai miyan

dil ki ye sogwariyan ru-ba-zawal ab nahin

ab na harim-e-naz se hoga tulu aaftab

qurb-e-jamal to gaya lutf-e-visal ab nahin

dur hai rah habib ki baat ye hai nasib ki

jina muhaal ho gaya marna muhaal ab nahin

raqs-kunan hai wan hawas us pe rahi na dastaras

husn-e-malih sakin-e-shahr-e-jamal ab nahin

tere karam pe ji rahi kab se hai meri kaj-rawi

koi jawab ab nahin koi sawal ab nahin

le ke nai nai ghazal aa hi gae 'farid' ab

sun ai charagh-e-anjuman tera zawal ab nahin