hamara azm ziyaada ki rahguzar kam hai

hamārā azm ziyāda ki rahguzar kam hai

har ek gaam pe lagtā hai ye safar kam hai

ujālā aur bhī kuchh phailne do āñgan meñ

abhī na sham.a bujhāo ki ye sahar kam hai

jo paḌh sako to bahut hai mirī jabīñ kī shikan

subūt-e-ġham ke liye varna chashm-e-tar kam hai

barābarī ke liye chāhiye kamī-beshī

makān ūñchā banāo zamīñ agar kam hai

ka.ī charāġh munavvar haiñ bazm meñ lekin

unheñ patā ye nahīñ raushnī kidhar kam hai

tumhārī zulf ke saa.e meñ dhuup be-ma.anī

mire liye to qayāmat kī dopahar kam hai

mile na zā.iqa kuchh itnī be-namak bhī nahīñ

hamārī baat meñ lekin zarā shakar kam hai

hamara azm ziyaada ki rahguzar kam hai

har ek gam pe lagta hai ye safar kam hai

ujala aur bhi kuchh phailne do aangan mein

abhi na shama bujhao ki ye sahar kam hai

jo paDh sako to bahut hai meri jabin ki shikan

subut-e-gham ke liye warna chashm-e-tar kam hai

barabari ke liye chahiye kami-beshi

makan uncha banao zamin agar kam hai

kai charagh munawwar hain bazm mein lekin

unhen pata ye nahin raushni kidhar kam hai

tumhaari zulf ke sae mein dhup be-mani

mere liye to qayamat ki dopahar kam hai

mile na zaiqa kuchh itni be-namak bhi nahin

hamari baat mein lekin zara shakar kam hai