hamara husn-e-talluq wafa bane na bane

hamārā husn-e-ta.alluq vafā bane na bane

vo ishva-sanj hai farruḳh-liqā bane na bane

chale haiñ shauq meñ ham yā-ḳhudā bane na bane

vo kyā sulūk kare dil-rubā bane na bane

kiyā tasavvur-e-maqsūd ne hameñ hairāñ

ye muntahā-e-nazar mudda.ā bane na bane

safīna bahr-e-ta.ashshuq meñ ab to Daal chukā

jo āshnā hai mirā nā-ḳhudā bane na bane

fareb-e-jalva hai naqsh-o-nigār fitrat meñ

jo mahv-e-dīd ho hairat-adā bane na bane

shahīd-e-kaif-e-tamannā hai āshiq-e-betāb

bahār-e-husn-e-safā ham-navā bane na bane

fusūñ ḳhayāl hai tahrīk-e-shauq-e-ra.anā.ī

vo mast-e-nāz mirā ḳhud-numā bane na bane

bañdhī hai ḳhanda-e-zer-e-labī se kuchh ummīd

vo zūd-ranj hai zūd-āshnā bane na bane

vo jazb-e-qalb ke nairañg kā huā qaa.il

hamārā aa.ina hairat-numā bane na bane

kabhī to jām-e-ināyat kā ho ġhanī 'sāqī'

ye be-niyāz tirā be-navā bane na bane

hamara husn-e-talluq wafa bane na bane

wo ishwa-sanj hai farruKH-liqa bane na bane

chale hain shauq mein hum ya-KHuda bane na bane

wo kya suluk kare dil-ruba bane na bane

kiya tasawwur-e-maqsud ne hamein hairan

ye muntaha-e-nazar muddaa bane na bane

safina bahr-e-tashshuq mein ab to Dal chuka

jo aashna hai mera na-KHuda bane na bane

fareb-e-jalwa hai naqsh-o-nigar fitrat mein

jo mahw-e-did ho hairat-ada bane na bane

shahid-e-kaif-e-tamanna hai aashiq-e-betab

bahaar-e-husn-e-safa ham-nawa bane na bane

fusun KHayal hai tahrik-e-shauq-e-ranai

wo mast-e-naz mera KHud-numa bane na bane

bandhi hai KHanda-e-zer-e-labi se kuchh ummid

wo zud-ranj hai zud-ashna bane na bane

wo jazb-e-qalb ke nairang ka hua qail

hamara aaina hairat-numa bane na bane

kabhi to jam-e-inayat ka ho ghani 'saqi'

ye be-niyaz tera be-nawa bane na bane