hamara ishq jis ke sath meyari raha barson

hamārā ishq jis ke saath meyārī rahā barsoñ

usī ke naam se ham par sitam jaarī rahā barsoñ

sitam ye hai shikasta-hāl haiñ ham us riyāsat meñ

hamāre naam kā sikka jahāñ jaarī rahā barsoñ

usī ko sauñp dī ham ne hifāzat apne ḳhemoñ kī

vo ādam-ḳhor jo lāshoñ kā byopārī rahā barsoñ

shanāsā thā hamāre dard kī lazzat se vo lekin

hamāre ġham meñ masrūf-e-adākārī rahā barsoñ

masā.ib laakh aa jaa.eñ magar jhuknā hai nā-mumkin

ye vo sar hai ki jis par tāj-e-ḳhuddārī rahā barsoñ

takalluf hai tasanño hai adākārī bhī hai us meñ

bechāra kyā kare shāhoñ kā darbārī rahā barsoñ

safar kitnā anokhā thā vo rāh-e-ishq kā 'sāġhar'

pahuñch kar manzil-e-maqsad pe bhī jaarī rahā barsoñ

hamara ishq jis ke sath meyari raha barson

usi ke nam se hum par sitam jari raha barson

sitam ye hai shikasta-haal hain hum us riyasat mein

hamare nam ka sikka jahan jari raha barson

usi ko saunp di hum ne hifazat apne KHemon ki

wo aadam-KHor jo lashon ka byopari raha barson

shanasa tha hamare dard ki lazzat se wo lekin

hamare gham mein masruf-e-adakari raha barson

masaib lakh aa jaen magar jhukna hai na-mumkin

ye wo sar hai ki jis par taj-e-KHuddari raha barson

takalluf hai tasanno hai adakari bhi hai us mein

bechaara kya kare shahon ka darbari raha barson

safar kitna anokha tha wo rah-e-ishq ka 'saghar'

pahunch kar manzil-e-maqsad pe bhi jari raha barson