ہمارا عشق جس کے ساتھ معیاری رہا برسوں

ہمارا عشق جس کے ساتھ معیاری رہا برسوں

اسی کے نام سے ہم پر ستم جاری رہا برسوں

ستم یہ ہے شکستہ حال ہیں ہم اس ریاست میں

ہمارے نام کا سکہ جہاں جاری رہا برسوں

اسی کو سونپ دی ہم نے حفاظت اپنے خیموں کی

وہ آدم خور جو لاشوں کا بیوپاری رہا برسوں

شناسا تھا ہمارے درد کی لذت سے وہ لیکن

ہمارے غم میں مصروف اداکاری رہا برسوں

مصائب لاکھ آ جائیں مگر جھکنا ہے نا ممکن

یہ وہ سر ہے کہ جس پر تاج خودداری رہا برسوں

تکلف ہے تصنع ہے اداکاری بھی ہے اس میں

بیچارہ کیا کرے شاہوں کا درباری رہا برسوں

سفر کتنا انوکھا تھا وہ راہ عشق کا ساغرؔ

پہنچ کر منزل مقصد پہ بھی جاری رہا برسوں