hamara jazb-e-sadiq shauq-e-kaamil dekhte jao

hamārā jazb-e-sādiq shauq-e-kāmil dekhte jaao

yahīñ khiñch kar chalī aa.egī manzil dekhte jaao

vafā-āmoz hai rashk-e-shahādat aaj maqtal meñ

hazāroñ hoñge bismil gird-e-bismil dekhte jaao

dam-e-āḳhir hai Thahro karb ḳhud taskīn bantā hai

huī jaatī hai ab āsān mushkil dekhte jaao

jin āñkhoñ se abhī tasvīr-e-rāhat tum ne dekhī hai

unhīñ āñkhoñ se ḳhūn-e-hasrat-e-dil dekhte jaao

dilam shud ḳhuun ḳhuuñ shud ashk ashk az-dīda bairūñ shud

mohabbat kā samar ulfat kā hāsil dekhte jaao

tumheñ dushman samajh kar bhī tumhīñ par jaan detā huuñ

mirī himmat mirī jur.at mirā dil dekhte jaao

koī bad-zan na ho aur ḳhātma bil-ḳhair ho jaa.e

ba-andāz-e-taġhāful sū-e-bismil dekhte jaao

na gum kar de kahīñ vāraftagī ai qāfile vaalo

mujhe har gaam par manzil-ba-manzil dekhte jaao

unheñ bechain kar deñgī falak ko bhī jalā deñgī

'munīr' aahoñ kā apnī zo.am-e-bātil dekhte jaao

hamara jazb-e-sadiq shauq-e-kaamil dekhte jao

yahin khinch kar chali aaegi manzil dekhte jao

wafa-amoz hai rashk-e-shahadat aaj maqtal mein

hazaron honge bismil gird-e-bismil dekhte jao

dam-e-aKHir hai Thahro karb KHud taskin banta hai

hui jati hai ab aasan mushkil dekhte jao

jin aankhon se abhi taswir-e-rahat tum ne dekhi hai

unhin aankhon se KHun-e-hasrat-e-dil dekhte jao

dilam shud KHun KHun shud ashk ashk az-dida bairun shud

mohabbat ka samar ulfat ka hasil dekhte jao

tumhein dushman samajh kar bhi tumhin par jaan deta hun

meri himmat meri jurat mera dil dekhte jao

koi bad-zan na ho aur KHatma bil-KHair ho jae

ba-andaz-e-taghaful su-e-bismil dekhte jao

na gum kar de kahin waraftagi ai qafile walo

mujhe har gam par manzil-ba-manzil dekhte jao

unhen bechain kar dengi falak ko bhi jala dengi

'munir' aahon ka apni zoam-e-baatil dekhte jao