hamara raaz-dan koi nahin hai

hamārā rāz-dāñ koī nahīñ hai

mohabbat kī zabāñ koī nahīñ hai

har ik ġhuncha hai murjhāyā huā sā

chaman meñ bāġhbāñ koī nahīñ hai

qafas se chhūT kar jaa.eñ kahāñ ham

hamārā āshiyāñ koī nahīñ hai

kahāñ jaa.eñ ye darmāñda musāfir

amīr-e-kārvāñ koī nahīñ hai

añdhere rāste roke khaḌe haiñ

charāg-e-kārvāñ koī nahīñ hai

haiñ pazhmurda tirī yādoñ kī kaliyāñ

bahār-e-jāvedāñ koī nahīñ hai

'ibārat hai hayāt-o-marg tum se

hamārī dāstāñ koī nahīñ hai

yahāñ har jins bik jaatī hai 'mumtāz'

suḳhan kā qadr-dāñ koī nahīñ hai

hamara raaz-dan koi nahin hai

mohabbat ki zaban koi nahin hai

har ek ghuncha hai murjhaya hua sa

chaman mein baghban koi nahin hai

qafas se chhuT kar jaen kahan hum

hamara aashiyan koi nahin hai

kahan jaen ye darmanda musafir

amir-e-karwan koi nahin hai

andhere raste roke khaDe hain

charag-e-karwan koi nahin hai

hain pazhmurda teri yaadon ki kaliyan

bahaar-e-jawedan koi nahin hai

'ibarat hai hayat-o-marg tum se

hamari dastan koi nahin hai

yahan har jins bik jati hai 'mumtaz'

suKHan ka qadr-dan koi nahin hai