hamara un ka talluq jo rasm-o-rah ka tha

hamārā un kā ta.alluq jo rasm-o-rāh kā thā

bas us meñ saarā salīqa mire nibāh kā thā

tujhe qarīb se dekhā to dil ne sochā hai

ki terā husn bhī ik zāviya nigāh kā thā

tujhe tarāsh ke dil meñ sajā liyā maiñ ne

qusūr is meñ mirī rif.at-e-nigāh kā thā

chale the yuuñ to ka.ī log kū-e-jānāñ ko

zarā sā ham se magar iḳhtilāf raah kā thā

tirī jafā kā ḳhudā silsila darāz kare

ki us se apnā ta.alluq bhī gaah gaah kā thā

hamara un ka talluq jo rasm-o-rah ka tha

bas us mein sara saliqa mere nibah ka tha

tujhe qarib se dekha to dil ne socha hai

ki tera husn bhi ek zawiya nigah ka tha

tujhe tarash ke dil mein saja liya main ne

qusur is mein meri rifat-e-nigah ka tha

chale the yun to kai log ku-e-jaanan ko

zara sa hum se magar iKHtilaf rah ka tha

teri jafa ka KHuda silsila daraaz kare

ki us se apna talluq bhi gah gah ka tha