hamara zikr aur unki zaban se

hamārā zikr aur un kī zabāñ se

kahāñ nisbat zamīñ ko āsmāñ se

kahūñ kyūñkar nazar se tū nihāñ hai

patā apnā milā tere nishāñ se

huā yuuñ bhī ki us kī samt aksar

chale aur lauT aa.e darmiyāñ se

jaleñ jab fasl-e-gul meñ bhī nasheman

to phir kyā kījiye shikva ḳhizāñ se

fareb-e-zindagī khā.eñ kahāñ tak

churā.eñ aañkh marg-e-nā-gahāñ se

havādis pesh aate haiñ zamīñ ko

sitāre TūTte haiñ āsmāñ se

bashar ke mas.ale hal karne shāyad

farishte ā.eñge ab āsmāñ se

janāb-e-ḳhizr se pūchheñ kisī din

milā kyā un kī umr-e-jāvedāñ se

dabī hai aag jo siine meñ 'at.har'

nahīñ kuchh kam kisī ātish-fishāñ se

hamara zikr aur un ki zaban se

kahan nisbat zamin ko aasman se

kahun kyunkar nazar se tu nihan hai

pata apna mila tere nishan se

hua yun bhi ki us ki samt aksar

chale aur lauT aae darmiyan se

jalen jab fasl-e-gul mein bhi nasheman

to phir kya kijiye shikwa KHizan se

fareb-e-zindagi khaen kahan tak

churaen aankh marg-e-na-gahan se

hawadis pesh aate hain zamin ko

sitare TuTte hain aasman se

bashar ke masale hal karne shayad

farishte aaenge ab aasman se

janab-e-KHizr se puchhen kisi din

mila kya un ki umr-e-jawedan se

dabi hai aag jo sine mein 'athar'

nahin kuchh kam kisi aatish-fishan se