hamare ahd ka manzar ajib manzar hai

hamāre ahd kā manzar ajiib manzar hai

bahār chehre pe dil meñ ḳhizāñ kā daftar hai

na ham-safar nā koī naqsh-e-pā nā rahbar hai

junūñ kī raah meñ kuchh hai to jaan kā Dar hai

har ek lamha hameñ Dar hai TuuT jaane kā

ye zindagī hai ki bosīda kāñch kā ghar hai

isī se laḌte hue ek umr biit ga.ī

mirī anā hī mire rāste kā patthar hai

tamām jism haiñ jis ke ḳhayāl meñ larzāñ

vo tīrgī kā nahīñ raushnī kā ḳhanjar hai

maiñ ek qatra huuñ lekin mirā nasīb to dekh

ki be-qarār mire ġham meñ ik samundar hai

usī ke pīchhe ravāñ huuñ maiñ pāgaloñ kī tarah

vo ek shai jo mirī dastaras se bāhar hai

isī ḳhayāl se miltā hai kuchh sakūñ dil ko

ki nā-subūrī to is daur kā muqaddar hai

kabhī to is se mulāqāt kī ghaḌī aa.e

jo mere dil meñ basā hai jo mere andar hai

uqāb-e-zulm ke panje abhī kahāñ TuuTe

abhī to fāḳhta-e-aman ḳhuun meñ tar hai

ḳhudā kī maar ho is jehl-e-āgahī pe 'hafīz'

ba-zo.am-e-ḳhud yahāñ har shaḳhs ik payambar hai

hamare ahd ka manzar ajib manzar hai

bahaar chehre pe dil mein KHizan ka daftar hai

na ham-safar na koi naqsh-e-pa na rahbar hai

junun ki rah mein kuchh hai to jaan ka Dar hai

har ek lamha hamein Dar hai TuT jaane ka

ye zindagi hai ki bosida kanch ka ghar hai

isi se laDte hue ek umr bit gai

meri ana hi mere raste ka patthar hai

tamam jism hain jis ke KHayal mein larzan

wo tirgi ka nahin raushni ka KHanjar hai

main ek qatra hun lekin mera nasib to dekh

ki be-qarar mere gham mein ek samundar hai

usi ke pichhe rawan hun main pagalon ki tarah

wo ek shai jo meri dastaras se bahar hai

isi KHayal se milta hai kuchh sakun dil ko

ki na-suburi to is daur ka muqaddar hai

kabhi to is se mulaqat ki ghaDi aae

jo mere dil mein basa hai jo mere andar hai

uqab-e-zulm ke panje abhi kahan TuTe

abhi to faKHta-e-aman KHun mein tar hai

KHuda ki mar ho is jehl-e-agahi pe 'hafiz'

ba-zoam-e-KHud yahan har shaKHs ek payambar hai