hamare azm-e-safar ke aage sawal-e-lail-o-nahaar kya hai

hamāre azm-e-safar ke aage savāl-e-lail-o-nahār kyā hai

ġham-e-mohabbat uThā liyā hai to gardish-e-rozgār kyā hai

umīd-e-fardā pe jiine vaalo hayāt kā e'tibār kyā hai

uTho ki manzil bulā rahī hai chalo ki ab intizār kyā hai

bikharte phūloñ na ham se pūchho hameñ to ab yaad hī nahīñ hai

chalo ye ahl-e-chaman se pūchheñ sukūn kyā hai qarār kyā hai

mirī nigāhoñ meñ phir rahā hai tirā takallum tirā tabassum

mirī nigāhoñ se koī pūchhe ye phuul kyā hai bahār kyā hai

nazar se dāman bachā bachā ke maiñ dil ko aarif banā rahā huuñ

tumhāre jalvoñ kī manziloñ meñ nigāh kā e'tibār kyā hai

bahār-e-gul meñ qadam qadam par shu.ūr-e-kāmil kī hai zarūrat

bahār un ke liye ḳhizāñ hai jo ye na samjhe bahār kyā hai

hamare azm-e-safar ke aage sawal-e-lail-o-nahaar kya hai

gham-e-mohabbat uTha liya hai to gardish-e-rozgar kya hai

umid-e-farda pe jine walo hayat ka e'tibar kya hai

uTho ki manzil bula rahi hai chalo ki ab intizar kya hai

bikharte phulon na hum se puchho hamein to ab yaad hi nahin hai

chalo ye ahl-e-chaman se puchhen sukun kya hai qarar kya hai

meri nigahon mein phir raha hai tera takallum tera tabassum

meri nigahon se koi puchhe ye phul kya hai bahaar kya hai

nazar se daman bacha bacha ke main dil ko aarif bana raha hun

tumhaare jalwon ki manzilon mein nigah ka e'tibar kya hai

bahaar-e-gul mein qadam qadam par shuur-e-kaamil ki hai zarurat

bahaar un ke liye KHizan hai jo ye na samjhe bahaar kya hai