hamare chehre pe ranj-o-malal aisa tha

hamāre chehre pe ranj-o-malāl aisā thā

masarratoñ kā zamāne meñ kaal aisā thā

fazā-e-shahr meñ bārūd kī thī bū shāmil

ki saañs lenā bhī ham ko muhāl aisā thā

amīr-e-shahr ke hoñToñ pe paḌ ga.e taale

ġharīb-e-shahr kā chubhtā savāl aisā thā

ba-vaqt-e-shām samundar meñ gir gayā sūraj

tamām din kī thakan se niDhāl aisā thā

tamām ghoñsle ḳhālī the nañge peḌoñ par

hudūd-e-dasht meñ vaqt-e-zavāl aisā thā

vo jab bhī milte haiñ zaḳhmoñ ke phuul dete haiñ

hamārā rābta un se bahāl aisā thā

zamīñ pe jhukne lagī ḳhud-ba-ḳhud har ik Daalī

daraḳht karb-e-numū se niDhāl aisā thā

ḳhud apne aap se bhī maiñ rahā huuñ begāna

hisār-e-dil meñ kisī kā ḳhayāl aisā thā

hamare chehre pe ranj-o-malal aisa tha

masarraton ka zamane mein kal aisa tha

faza-e-shahr mein barud ki thi bu shamil

ki sans lena bhi hum ko muhaal aisa tha

amir-e-shahr ke honTon pe paD gae tale

gharib-e-shahr ka chubhta sawal aisa tha

ba-waqt-e-sham samundar mein gir gaya suraj

tamam din ki thakan se niDhaal aisa tha

tamam ghonsle KHali the nange peDon par

hudud-e-dasht mein waqt-e-zawal aisa tha

wo jab bhi milte hain zaKHmon ke phul dete hain

hamara rabta un se bahaal aisa tha

zamin pe jhukne lagi KHud-ba-KHud har ek Dali

daraKHt karb-e-numu se niDhaal aisa tha

KHud apne aap se bhi main raha hun begana

hisar-e-dil mein kisi ka KHayal aisa tha