ہمارے دھیان میں ہر لمحہ مسکراتا ہے

ہمارے دھیان میں ہر لمحہ مسکراتا ہے

وہ ایک شخص ہمیں اب بھی یاد آتا ہے

جو ہارتا ہے محبت میں جیت جاتا ہے

پھر اس کے بعد فقط قہقہے لگاتا ہے

کوئی نہ ہوگا مرے بعد میرے جیسا یہاں

یہ بات مجھ کو مرا رازداں بتاتا ہے

غلط درست کے بارے میں جانتا نہیں کچھ

میں کیا کروں کہ مجھے عشق راس آتا ہے

ترے وجود سے مٹ جاتی ہے مری وحشت

ترا یقین مجھے منفرد بناتا ہے

جو دعوے کرتے ہیں سچائی کے یہاں مسعودؔ

پھر ان کا چہرہ ہمیں سارے سچ بتاتا ہے