ہمارے دل کا وہ عالم ہے ان کے نام کے بعد

ہمارے دل کا وہ عالم ہے ان کے نام کے بعد

کہ جیسے رات کی رانی کھلی ہو شام کے بعد

وہ شاخ گل کی طرح دست احمریں اس کا

وہ مڑ کے دیکھنا اس کا مجھے سلام کے بعد

ہر ایک دور میں یہ سوچتے رہے ہم لوگ

کہ اب سکون ملے گا نئے نظام کے بعد

میں ساتھ چل تو دیا ہوں مگر یہ خوف بھی ہے

کہ تم فریب نہ دے جاؤ چند گام کے بعد

بچانے نکلے ہیں کس کو سلامتی دستے

بچا ہی کون ہے بستی میں قتل عام کے بعد

یہ سر بچا کے گزر گاہ حادثات سے ہم

خدا کا شکر کریں گھر تو آئے شام کے بعد

فساد الجھے ہوئے مسئلوں کا حل تو نہیں

یہ شعلے اور بھڑکتے ہیں انتقام کے بعد

میں جیسے ٹوٹ گیا ہوں بکھر گیا ہوں بشیرؔ

عجیب حال ہے میرا شکست جام کے بعد