hamare dil ka wo aalam hai un ke nam ke baad

hamāre dil kā vo 'ālam hai un ke naam ke baa'd

ki jaise raat kī raanī khilī ho shaam ke baa'd

vo shāḳh-e-gul kī tarah dast-e-ahmarīñ us kā

vo muḌ ke dekhnā us kā mujhe salām ke baa'd

har ek daur meñ ye sochte rahe ham log

ki ab sukūn milegā na.e nizām ke baa'd

maiñ saath chal to diyā huuñ magar ye ḳhauf bhī hai

ki tum fareb na de jaao chand gaam ke baa'd

bachāne nikle haiñ kis ko salāmatī daste

bachā hī kaun hai bastī meñ qatl-e-'ām ke baa'd

ye sar bachā ke guzargāh-e-hādsāt se ham

ḳhudā kā shukr kareñ ghar to aa.e shaam ke baa'd

fasād uljhe hue mas.aloñ kā hal to nahīñ

ye sho'le aur bhaḌakte haiñ intiqām ke baa'd

maiñ jaise TuuT gayā huuñ bikhar gayā huuñ 'bashīr'

'ajīb haal hai merā shikast-e-jām ke baa'd

hamare dil ka wo 'alam hai un ke nam ke ba'd

ki jaise raat ki rani khili ho sham ke ba'd

wo shaKH-e-gul ki tarah dast-e-ahmarin us ka

wo muD ke dekhna us ka mujhe salam ke ba'd

har ek daur mein ye sochte rahe hum log

ki ab sukun milega nae nizam ke ba'd

main sath chal to diya hun magar ye KHauf bhi hai

ki tum fareb na de jao chand gam ke ba'd

bachane nikle hain kis ko salamati daste

bacha hi kaun hai basti mein qatl-e-'am ke ba'd

ye sar bacha ke guzargah-e-hadsat se hum

KHuda ka shukr karen ghar to aae sham ke ba'd

fasad uljhe hue masalon ka hal to nahin

ye sho'le aur bhaDakte hain intiqam ke ba'd

main jaise TuT gaya hun bikhar gaya hun 'bashir'

'ajib haal hai mera shikast-e-jam ke ba'd