ہمارے دل کی زمیں پر کٹاؤ اور بڑھا

ہمارے دل کی زمیں پر کٹاؤ اور بڑھا

اسی سبب سے غموں کا بہاؤ اور بڑھا

میں نیند کیا ترے بازار شب میں لے آیا

پھر اس کے بعد تو خوابوں کا بھاؤ اور بڑھا

یہ کیسے خواب زدہ راستوں میں آ گئے ہیں

کہ جتنا آگے بڑھے ہم گھماؤ اور بڑھا

یہیں پہنچ کے میں ڈوبا ہوں بارہا ملاح

یہاں سے آگے ادھر دور ناؤ اور بڑھا

تکلفات نے زنجیر باندھ دی دل پر

سکون ختم ہوا ہے تناؤ اور بڑھا

تمام دشت بدن میں مٹھاس جاگ اٹھی

رگوں میں موجۂ خوں کا دباؤ اور بڑھا

یہ آگ مجھ میں اترنے سے ڈر رہی ہے نبیلؔ

اسے ہوا دے مسلسل الاؤ اور بڑھا