hamare dil mein koi aarzu nahin baqi

hamāre dil meñ koī aarzū nahīñ baaqī

hamāre phuul meñ ab rañg-o-bū nahīñ baaqī

bahut kahī dil-e-nādāñ adū nahīñ baaqī

mirā adū mire pahlū meñ tū nahīñ baaqī

tumhāre tiir kī ab aarzū nahīñ baaqī

huā hai piip kaleja lahū nahīñ baaqī

ye mai-kada hai ki masjid ye aab hai ki sharāb

koī bhī zarf barā-e-vuzū nahīñ baaqī

dharā hai kyā mire ghar meñ ki mohtasib legā

pur-az-sharāb vo jām-o-subū nahīñ baaqī

vo rah ke ġhair kī sohbat meñ ho ga.e kuchh aur

vo baat pichhlī sī aglī sī ḳhū nahīñ baaqī

thakā paḌā huuñ to vāmāñdgī ye kahtī hai

unheñ kisī kī bhī ab justujū nahīñ baaqī

jo mai kī buuñd na niklī to paḌ gayā paanī

ba-hāl-e-ḳhvesh subū ab subū nahīñ baaqī

hamārī aap kī baat uTh rahī hai mahshar par

hamārī aap kī kuchh guftugū nahīñ baaqī

jo nikle ḳhaar to dāman se sūiyāñ uljhīñ

jagah zarā sī kahīñ be-rafū nahīñ baaqī

baḌhī hai baat qayāmat meñ jhūTe va.ade par

vo munfa.il hai to kuchh guftugū nahīñ baaqī

ye mohtasib hai abas ghar ko sūñghtā phirtā

ki būñd-bar bhī mai-e-mushk-bū nahīñ baaqī

huā hai aa.ine ke saath aks ko saktā

kisī meñ jaan tire rū-ba-rū nahīñ baaqī

baheñ sharāb ke dariyā to ham ko lutf nahīñ

ki sabza kuchh bhī lab-e-ābjū nahīñ baaqī

baḌhī hai pāk-nihādī ye bāda-noshoñ kī

ki ab namāz meñ qaid-e-vuzū nahīñ baaqī

hamārī aañkh meñ tārīk bazm-e-ālam hai

jo zeb-e-bazm the vo sham.a-rū nahīñ baaqī

'riyāz' maut ko kyuuñ maut aa.ī jaatī hai

hameñ to maut kī bhī aarzū nahīñ baaqī

hamare dil mein koi aarzu nahin baqi

hamare phul mein ab rang-o-bu nahin baqi

bahut kahi dil-e-nadan adu nahin baqi

mera adu mere pahlu mein tu nahin baqi

tumhaare tir ki ab aarzu nahin baqi

hua hai pip kaleja lahu nahin baqi

ye mai-kada hai ki masjid ye aab hai ki sharab

koi bhi zarf bara-e-wuzu nahin baqi

dhara hai kya mere ghar mein ki mohtasib lega

pur-az-sharab wo jam-o-subu nahin baqi

wo rah ke ghair ki sohbat mein ho gae kuchh aur

wo baat pichhli si agli si KHu nahin baqi

thaka paDa hun to wamandgi ye kahti hai

unhen kisi ki bhi ab justuju nahin baqi

jo mai ki bund na nikli to paD gaya pani

ba-haal-e-KHwesh subu ab subu nahin baqi

hamari aap ki baat uTh rahi hai mahshar par

hamari aap ki kuchh guftugu nahin baqi

jo nikle KHar to daman se suiyan uljhin

jagah zara si kahin be-rafu nahin baqi

baDhi hai baat qayamat mein jhuTe wade par

wo munfail hai to kuchh guftugu nahin baqi

ye mohtasib hai abas ghar ko sunghta phirta

ki bund-bar bhi mai-e-mushk-bu nahin baqi

hua hai aaine ke sath aks ko sakta

kisi mein jaan tere ru-ba-ru nahin baqi

bahen sharab ke dariya to hum ko lutf nahin

ki sabza kuchh bhi lab-e-abju nahin baqi

baDhi hai pak-nihadi ye baada-noshon ki

ki ab namaz mein qaid-e-wuzu nahin baqi

hamari aankh mein tarik bazm-e-alam hai

jo zeb-e-bazm the wo shama-ru nahin baqi

'riyaz' maut ko kyun maut aai jati hai

hamein to maut ki bhi aarzu nahin baqi