hamare dil mein tumhaari chahat kabhi thi jaanan par ab nahin hai

hamāre dil meñ tumhārī chāhat kabhī thī jānāñ par ab nahīñ hai

hameñ bhī tum se bahut mohabbat kabhī thī jānāñ par ab nahīñ hai

ham apne ashkoñ ko rok leñge magar na shikva koī kareñge

tumhāre shāne kī vo zarūrat kabhī thī jānāñ par ab nahīñ hai

vo rū-e-raushan vo mast āñkheñ thī jin pe qurbāñ sabhī bahāreñ

tumhāre chehre kī aisī rañgat kabhī thī jānāñ par ab nahīñ hai

ham itne nādān bhī nahīñ haiñ ke bārishoñ meñ patang uḌā.eñ

hamārī itnī ḳharāb 'ādat kabhī thī jānāñ par ab nahīñ hai

tumheñ pashemān dekhne kā ḳhayāl dil meñ bahut thā par ab

hamārī āñkhoñ ko aisī hasrat kabhī thī jānāñ par ab nahīñ hai

tumhārī jānib uTheñ jo āñkheñ ham aisī āñkhoñ ko noch Dāleñ

hameñ raqīboñ se yuuñ adāvat kabhī thī jānāñ par ab nahīñ hai

in āñdhiyoñ se bachā ke rakhnā charāġh apne tamām 'sāhil'

havā se laḌne kī ham meñ himmat kabhī thī jānāñ par ab nahīñ hai

hamare dil mein tumhaari chahat kabhi thi jaanan par ab nahin hai

hamein bhi tum se bahut mohabbat kabhi thi jaanan par ab nahin hai

hum apne ashkon ko rok lenge magar na shikwa koi karenge

tumhaare shane ki wo zarurat kabhi thi jaanan par ab nahin hai

wo ru-e-raushan wo mast aankhen thi jin pe qurban sabhi bahaaren

tumhaare chehre ki aisi rangat kabhi thi jaanan par ab nahin hai

hum itne nadan bhi nahin hain ke barishon mein patang uDaen

hamari itni KHarab 'adat kabhi thi jaanan par ab nahin hai

tumhein pasheman dekhne ka KHayal dil mein bahut tha par ab

hamari aankhon ko aisi hasrat kabhi thi jaanan par ab nahin hai

tumhaari jaanib uThen jo aankhen hum aisi aankhon ko noch Dalen

hamein raqibon se yun adawat kabhi thi jaanan par ab nahin hai

in aandhiyon se bacha ke rakhna charagh apne tamam 'sahil'

hawa se laDne ki hum mein himmat kabhi thi jaanan par ab nahin hai