hamare dil mein wo rahta hai jo makin ki tarah

hamāre dil meñ vo rahtā hai jo makīñ kī tarah

gumān hotā hai bilkul kisī yaqīñ kī tarah

khaḌe hue the yahīñ raat jab yahāñ utrī

hazār chāñd sitāre tamāsh-bīñ kī tarah

agar qubūl nahīñ hai to chiir do mirā ḳhat

na rakkho dil meñ koī ḳhat ḳhat-e-jabīñ kī tarah

tumhāre vā'da-o-paimāñ pe kaan kyā dharte

na'am na'am kī sadā thī nahīñ nahīñ kī tarah

hamārā ghar bhī filistīn meñ agar hotā

to ham zamīn pe hote falak-nashīñ kī tarah

vo pūchhte haiñ batāo ki is meñ hai ki nahīñ

balā kā jāh-o-hasham chashm-e-surmagīñ kī tarah

kināre aur na jaao ki sātveñ din hī

uThī hai lahr samundar meñ chaudhvīñ kī tarah

yahī tarīq rahā to hamāre baa'd ke log

paḌheñge ham ko asātīr-ul-avvalīñ kī tarah

lage hue haiñ surangoñ ko toḌne meñ vahī

pale haiñ jo yahāñ af'ī-e-āstīñ kī tarah

hamare dil mein wo rahta hai jo makin ki tarah

guman hota hai bilkul kisi yaqin ki tarah

khaDe hue the yahin raat jab yahan utri

hazar chand sitare tamash-bin ki tarah

agar qubul nahin hai to chir do mera KHat

na rakkho dil mein koi KHat KHat-e-jabin ki tarah

tumhaare wa'da-o-paiman pe kan kya dharte

na'am na'am ki sada thi nahin nahin ki tarah

hamara ghar bhi filistin mein agar hota

to hum zamin pe hote falak-nashin ki tarah

wo puchhte hain batao ki is mein hai ki nahin

bala ka jah-o-hasham chashm-e-surmagin ki tarah

kinare aur na jao ki satwen din hi

uThi hai lahr samundar mein chaudhwin ki tarah

yahi tariq raha to hamare ba'd ke log

paDhenge hum ko asatir-ul-awwalin ki tarah

lage hue hain surangon ko toDne mein wahi

pale hain jo yahan af'i-e-astin ki tarah