hamare dil se rang-e-gham na utra

hamāre dil se rañg-e-ġham na utrā

bharā bhī zaḳhm to marham na utrā

bahut talḳhī thī nākāmī kī lekin

ḳhumār-e-koshish-e-paiham na utrā

tahammul ne bahut tūfāñ kiye jazb

magar dariyā-e-shām-e-ġham na utrā

baḌhī kuchh aur gul kī tishna-kāmī

jigar meñ qatra-e-shabnam na utrā

na pahuñchā tāq-e-nisyāñ tak kabhī haath

dobāra ham se jām-e-jam na utrā

huī zāhir na insāñ kī haqīqat

libās-e-shādī-o-mātam na utrā

tasavvur ab haqīqat ban gayā hai

tumhārā aks tum se kam na utrā

sarāyat kar ga.ī jab maut 'nāzish'

kisī tadbīr se ye sam na utrā

hamare dil se rang-e-gham na utra

bhara bhi zaKHm to marham na utra

bahut talKHi thi nakaami ki lekin

KHumar-e-koshish-e-paiham na utra

tahammul ne bahut tufan kiye jazb

magar dariya-e-sham-e-gham na utra

baDhi kuchh aur gul ki tishna-kaami

jigar mein qatra-e-shabnam na utra

na pahuncha taq-e-nisyan tak kabhi hath

dobara hum se jam-e-jam na utra

hui zahir na insan ki haqiqat

libas-e-shadi-o-matam na utra

tasawwur ab haqiqat ban gaya hai

tumhaara aks tum se kam na utra

sarayat kar gai jab maut 'nazish'

kisi tadbir se ye sam na utra