hamare hafize be-kar ho gae sahib

hamāre hāfize be-kār ho ga.e sāhib

javāb aur bhī dushvār ho ga.e sāhib

use bhī shauq thā tasvīr meñ utarne kā

to ham bhī shauq se dīvār ho ga.e sāhib

tire libās ke rangoñ meñ kho ga.ī fitrat

ye phūl-shūl to be-kār ho ga.e sāhib

gale lagā ke use ḳhvāb meñ bahut ro.e

aur itnā ro.e ki bedār ho ga.e sāhib

hamārī ruuh parindoñ ko sauñp dī jaa.e

ki ye badan to gunahgār ho ga.e sāhib

nazar milā.ī to ik aag ne lapeT liyā

badan jalā.e to gulzār ho ga.e sāhib

charāġh dafn kiye the 'nadīm' qabroñ meñ

zamīñ se chāñd numūdār ho ga.e sāhib

hamare hafize be-kar ho gae sahib

jawab aur bhi dushwar ho gae sahib

use bhi shauq tha taswir mein utarne ka

to hum bhi shauq se diwar ho gae sahib

tere libas ke rangon mein kho gai fitrat

ye phul-shul to be-kar ho gae sahib

gale laga ke use KHwab mein bahut roe

aur itna roe ki bedar ho gae sahib

hamari ruh parindon ko saunp di jae

ki ye badan to gunahgar ho gae sahib

nazar milai to ek aag ne lapeT liya

badan jalae to gulzar ho gae sahib

charagh dafn kiye the 'nadim' qabron mein

zamin se chand numudar ho gae sahib