ہمارے حال زبوں پر تو مسکرایا بھی تھا

ہمارے حال زبوں پر تو مسکرایا بھی تھا

ضرور اپنی صفوں میں کوئی پرایا بھی تھا

محبتوں میں نئے تجربے ضروری ہیں کیا

ہمیں تو پچھلے برس تم نے آزمایا بھی تھا

مری سحر ستم شب سے بے خبر تو نہ تھی

فلک کی آنکھ میں اک اشک ڈبڈبایا بھی تھا

تجھے پہن کے رتیں اب کے سرخ رو بھی ہوئیں

تری ہنسی نے بہاروں کو گدگدایا بھی تھا

جلا ہوں دوہری طرح دوپہر کے سورج میں

کہ میرے پاؤں کے نیچے تو میرا سایا بھی تھا

بٹھائے رکھا رقیبوں کو جس اشارے سے

اسی میں اٹھنے کا اپنے لئے کنایہ بھی تھا

ستم کے دور کی اعجازؔ خوبیاں تو نہ بھول

کہ آمروں کے دلوں میں غم رعایا بھی تھا