hamare haal-e-zabun par tu muskuraya bhi tha

hamāre hāl-e-zabūñ par tū muskurāyā bhī thā

zarūr apnī safoñ meñ koī parāyā bhī thā

mohabbatoñ meñ na.e tajrabe zarūrī haiñ kyā

hameñ to pichhle baras tum ne āzmāyā bhī thā

mirī sahar sitam-e-shab se be-ḳhabar to na thī

falak kī aañkh meñ ik ashk DabDabāyā bhī thā

tujhe pahan ke ruteñ ab ke surḳh-rū bhī huiiñ

tirī hañsī ne bahāroñ ko gudgudāyā bhī thā

jalā huuñ dohrī tarah dopahar ke sūraj meñ

ki mere paañv ke nīche to merā saayā bhī thā

biThā.e rakkhā raqīboñ ko jis ishāre se

usī meñ uThne kā apne liye kināya bhī thā

sitam ke daur kī 'ejāz' ḳhūbiyāñ to na bhuul

ki āmiroñ ke diloñ meñ ġham-e-re.āyā bhī thā

hamare haal-e-zabun par tu muskuraya bhi tha

zarur apni safon mein koi paraya bhi tha

mohabbaton mein nae tajrabe zaruri hain kya

hamein to pichhle baras tum ne aazmaya bhi tha

meri sahar sitam-e-shab se be-KHabar to na thi

falak ki aankh mein ek ashk DabDabaya bhi tha

tujhe pahan ke ruten ab ke surKH-ru bhi huin

teri hansi ne bahaaron ko gudgudaya bhi tha

jala hun dohri tarah dopahar ke suraj mein

ki mere panw ke niche to mera saya bhi tha

biThae rakkha raqibon ko jis ishaare se

usi mein uThne ka apne liye kinaya bhi tha

sitam ke daur ki 'ejaz' KHubiyan to na bhul

ki aamiron ke dilon mein gham-e-reaya bhi tha