hamare hath mein bachchon ne titliyan rakh din

hamāre haath meñ bachchoñ ne titliyāñ rakh diiñ

to apne haath kī ham ne bhī barchhiyāñ rakh diiñ

huā thā zikr achānak hī maut kā mujh se

taḌap ke us ne mere lab pe ungliyāñ rakh diiñ

rihā kiyā hai parinde ko is tarīqe se

paroñ ko khol ke pairoñ meñ beḌiyāñ rakh diiñ

tum us ġharīb kī jholī meñ rizq bhī rakhnā

ki jis ġharīb kī godī meñ beTiyāñ rakh diiñ

hadoñ ko toḌ gayā yuuñ ġharīb banjāra

ki shāhzādī ke hāthoñ meñ chūḌiyāñ rakh diiñ

jab un ke raah ke kāñTe haTā nahīñ paa.e

to un ke paañv ke nīche hatheliyāñ rakh diiñ

merī du'ā hai salāmat rahe qayāmat tak

vo 'ishq jis ne laboñ par ye siskiyāñ rakh diiñ

hamare hath mein bachchon ne titliyan rakh din

to apne hath ki hum ne bhi barchhiyan rakh din

hua tha zikr achanak hi maut ka mujh se

taDap ke us ne mere lab pe ungliyan rakh din

riha kiya hai parinde ko is tariqe se

paron ko khol ke pairon mein beDiyan rakh din

tum us gharib ki jholi mein rizq bhi rakhna

ki jis gharib ki godi mein beTiyan rakh din

hadon ko toD gaya yun gharib banjara

ki shahzadi ke hathon mein chuDiyan rakh din

jab un ke rah ke kanTe haTa nahin pae

to un ke panw ke niche hatheliyan rakh din

meri du'a hai salamat rahe qayamat tak

wo 'ishq jis ne labon par ye siskiyan rakh din