hamare hath mein KHanjar nahin the

hamāre haath meñ ḳhanjar nahīñ the

kisī bhī vaqt ham kāyer nahīñ the

har ik ġham se shanāsā ho ga.e haiñ

kabhī ham ranj ke ḳhūgar nahīñ the

vo kitne ḳhush the be-chhat kī zamīñ par

sabab ye hai ki un ke ghar nahīñ the

vo bāteñ kar rahe the āsmāñ kī

vo jin ke bāzuoñ meñ par nahīñ the

unheñ thī fikr nāhaq apne sar kī

mire to haath meñ patthar nahīñ the

huī thī sher se tamhīd pahle

vo sab naqqāl the shā.ir nahīñ the

use dekheñ palaT kar phir dobāra

tirī galiyoñ meñ vo manzar nahīñ the

jo chalte the hamāre saath 'asġhar'

zarā aage the vo rahbar nahīñ the

hamare hath mein KHanjar nahin the

kisi bhi waqt hum kayer nahin the

har ek gham se shanasa ho gae hain

kabhi hum ranj ke KHugar nahin the

wo kitne KHush the be-chhat ki zamin par

sabab ye hai ki un ke ghar nahin the

wo baaten kar rahe the aasman ki

wo jin ke bazuon mein par nahin the

unhen thi fikr nahaq apne sar ki

mere to hath mein patthar nahin the

hui thi sher se tamhid pahle

wo sab naqqal the shair nahin the

use dekhen palaT kar phir dobara

teri galiyon mein wo manzar nahin the

jo chalte the hamare sath 'asghar'

zara aage the wo rahbar nahin the