ہمارے ہاتھ میں خنجر نہیں تھے

ہمارے ہاتھ میں خنجر نہیں تھے

کسی بھی وقت ہم کائر نہیں تھے

ہر اک غم سے شناسا ہو گئے ہیں

کبھی ہم رنج کے خوگر نہیں تھے

وہ کتنے خوش تھے بے چھت کی زمیں پر

سبب یہ ہے کہ ان کے گھر نہیں تھے

وہ باتیں کر رہے تھے آسماں کی

وہ جن کے بازوؤں میں پر نہیں تھے

انہیں تھی فکر ناحق اپنے سر کی

مرے تو ہاتھ میں پتھر نہیں تھے

ہوئی تھی شعر سے تمہید پہلے

وہ سب نقال تھے شاعر نہیں تھے

اسے دیکھیں پلٹ کر پھر دوبارہ

تری گلیوں میں وہ منظر نہیں تھے

جو چلتے تھے ہمارے ساتھ اصغرؔ

ذرا آگے تھے وہ رہبر نہیں تھے