hamare kaam ulTe paD gae hain

hamāre kaam ulTe paḌ ga.e haiñ

sabhī ke sard lahje paḌ ga.e haiñ

tumhārī baat sunte hī achānak

mire sab rañg phīke paḌ ga.e haiñ

kisī tasvīr par hai kaam jaarī

ka.ī āñkhoñ pe halqe paḌ ga.e haiñ

tirī āñkhoñ kā pīchhā karte karte

mire a.asāb Dhīle paḌ ga.e haiñ

tumhārī kar raheñ haiñ jab se ġhībat

dar-o-dīvār niile paḌ ga.e haiñ

faqat vo muskurā.e jā rahā hai

tabhī to phuul saste paḌ ga.e haiñ

libāsoñ kī dalīleñ dene vaalo

yahāñ kirdār maile paḌ ga.e haiñ

hamare kaam ulTe paD gae hain

sabhi ke sard lahje paD gae hain

tumhaari baat sunte hi achanak

mere sab rang phike paD gae hain

kisi taswir par hai kaam jari

kai aankhon pe halqe paD gae hain

teri aankhon ka pichha karte karte

mere aasab Dhile paD gae hain

tumhaari kar rahen hain jab se ghibat

dar-o-diwar nile paD gae hain

faqat wo muskurae ja raha hai

tabhi to phul saste paD gae hain

libason ki dalilen dene walo

yahan kirdar maile paD gae hain