hamare KHwab tanha hain hamare gham akele hain

hamāre ḳhvāb tanhā haiñ hamāre ġham akele haiñ

ghire haiñ kitne hañgāmoñ meñ phir bhī ham akele haiñ

tumhāre paas bhī sūkhe hue kuchh phuul haiñ tanhā

hamāre saath bhī kho.e hue mausam akele haiñ

chale aao ki dil kī dhaḌkanoñ meñ naġhmagī bhar deñ

tumhārā saaz tanhā hai mire sargam akele haiñ

bharī mahfil meñ ye ehsās-e-tanhā.ī hameñ kyoñ hai

na jaane kyoñ tirī duniyā meñ yā-rab ham akele haiñ

ḳhushī ne jin ko Thukrāyā vo manzil tak nahīñ pahuñche

sunā hai aaj tak āvārgān-e-ġham akele haiñ

na jaane log pīchhe rah ga.e yā duur jā pahuñche

jahāñ tak dekhte haiñ rāste meñ ham akele haiñ

hamare KHwab tanha hain hamare gham akele hain

ghire hain kitne hangamon mein phir bhi hum akele hain

tumhaare pas bhi sukhe hue kuchh phul hain tanha

hamare sath bhi khoe hue mausam akele hain

chale aao ki dil ki dhaDkanon mein naghmagi bhar den

tumhaara saz tanha hai mere sargam akele hain

bhari mahfil mein ye ehsas-e-tanhai hamein kyon hai

na jaane kyon teri duniya mein ya-rab hum akele hain

KHushi ne jin ko Thukraya wo manzil tak nahin pahunche

suna hai aaj tak aawargan-e-gham akele hain

na jaane log pichhe rah gae ya dur ja pahunche

jahan tak dekhte hain raste mein hum akele hain