ہمارے لب پہ جب اس بے وفا کا نام آتا ہے

ہمارے لب پہ جب اس بے وفا کا نام آتا ہے

بڑی مشکل سے قابو میں دل ناکام آتا ہے

حواس و ہوش کی دنیا لٹا دیتا ہوں ساقی پر

قسم اللہ کی میری طرف جب جام آتا ہے

جفا شیوہ ہے ان کا ہے شعار اپنا وفاداری

انہیں وہ کام آتا ہے ہمیں یہ کام آتا ہے

نظر آتے ہیں جب دو آدمی عہد وفا کرتے

مری آنکھوں کے آگے عشق کا انجام آتا ہے

صراحی در بغل ساغر بکف پیتا ہوا پیہم

نہ جانے کون سی دنیا سے مے آشام آتا ہے

میں ڈرتا ہوں نہ حرف آئے کہیں پردہ نشینی پر

لرز جاتا ہوں جب لب پر کسی کا نام آتا ہے

جو جیتا ہوں تو ان کی شوخیاں جینے نہیں دیتیں

جو مرتا ہوں وفاؤں پر مری الزام آتا ہے

سلامؔ سوختہ قسمت کی محفل ہے عجب محفل

ستارا صبح کا بن کر چراغ شام آتا ہے