hamare lab pe jab us bewafa ka nam aata hai

hamāre lab pe jab us bevafā kā naam aatā hai

baḌī mushkil se qaabū meñ dil-e-nākām aatā hai

havās-o-hosh kī duniyā luTā detā huuñ saaqī par

qasam allāh kī merī taraf jab jaam aatā hai

jafā sheva hai un kā hai shi.ār apnā vafādārī

unheñ vo kaam aatā hai hameñ ye kaam aatā hai

nazar aate haiñ jab do aadmī ahd-e-vafā karte

mirī āñkhoñ ke aage ishq kā anjām aatā hai

surāhī dar-baġhal sāġhar-ba-kaf piitā huā paiham

na jaane kaun sī duniyā se mai-āshām aatā hai

maiñ Dartā huuñ na harf aa.e kahīñ parda-nashīnī par

laraz jaatā huuñ jab lab par kisī kā naam aatā hai

jo jiitā huuñ to un kī shoḳhiyāñ jiine nahīñ detīñ

jo martā huuñ vafāoñ par mirī ilzām aatā hai

'salām'-e-soḳhta-qismat kī mahfil hai ajab mahfil

sitārā sub.h kā ban kar charāġh-e-shām aatā hai

hamare lab pe jab us bewafa ka nam aata hai

baDi mushkil se qabu mein dil-e-nakaam aata hai

hawas-o-hosh ki duniya luTa deta hun saqi par

qasam allah ki meri taraf jab jam aata hai

jafa shewa hai un ka hai shiar apna wafadari

unhen wo kaam aata hai hamein ye kaam aata hai

nazar aate hain jab do aadmi ahd-e-wafa karte

meri aankhon ke aage ishq ka anjam aata hai

surahi dar-baghal saghar-ba-kaf pita hua paiham

na jaane kaun si duniya se mai-asham aata hai

main Darta hun na harf aae kahin parda-nashini par

laraz jata hun jab lab par kisi ka nam aata hai

jo jita hun to un ki shoKHiyan jine nahin detin

jo marta hun wafaon par meri ilzam aata hai

'salam'-e-soKHta-qismat ki mahfil hai ajab mahfil

sitara subh ka ban kar charagh-e-sham aata hai