hamare samne jo muskura ke chalte hain

hamāre sāmne jo muskurā ke chalte haiñ

firāq-e-yār meñ vo karvaTeñ badalte haiñ

vo jin ke ātish-e-ulfat se dil pighalte haiñ

so un kī āñkhoñ se aañsū bajā nikalte haiñ

tumheñ ḳhudā ne banāyā hai sang-e-marmar se

tumhāre jism pe shams-o-qamar phisalte haiñ

vo aur haiñ jo bahakte haiñ jaam pī pī kar

ham ahl-e-zarf ke pī kar qadam sañbhalte haiñ

hamārī tishna-labī kā imaam saaqī hai

hamāre jaise sabhī mai-kadoñ meñ palte haiñ

nasīb hotī hai ash.ār meñ farāvānī

zamīn-e-fikr pe jab eḌiyāñ masalte haiñ

tumhāre ashk bhī nāzuk-mizāj haiñ jānāñ

nikal ke aañkh se ruḳhsār par machalte haiñ

tū goyā ho to zamīñ āsmān raqs kare

tū chup rahe to zamānoñ ke dil dahalte haiñ

vo ho gayā hai takabbur kī beḌiyoñ meñ asiir

use ḳhabar hī nahīñ āftāb Dhalte haiñ

tumhāre jaane se kaliyoñ kā dam nikaltā hai

tumhāre aane se gulshan meñ phuul khilte haiñ

mire uruuj kā mehvar hai sādgī merī

vo is liye to mirī sādgī se jalte haiñ

hamare samne jo muskura ke chalte hain

firaq-e-yar mein wo karwaTen badalte hain

wo jin ke aatish-e-ulfat se dil pighalte hain

so un ki aankhon se aansu baja nikalte hain

tumhein KHuda ne banaya hai sang-e-marmar se

tumhaare jism pe shams-o-qamar phisalte hain

wo aur hain jo bahakte hain jam pi pi kar

hum ahl-e-zarf ke pi kar qadam sanbhalte hain

hamari tishna-labi ka imam saqi hai

hamare jaise sabhi mai-kadon mein palte hain

nasib hoti hai ashaar mein farawani

zamin-e-fikr pe jab eDiyan masalte hain

tumhaare ashk bhi nazuk-mizaj hain jaanan

nikal ke aankh se ruKHsar par machalte hain

tu goya ho to zamin aasman raqs kare

tu chup rahe to zamanon ke dil dahalte hain

wo ho gaya hai takabbur ki beDiyon mein asir

use KHabar hi nahin aaftab Dhalte hain

tumhaare jaane se kaliyon ka dam nikalta hai

tumhaare aane se gulshan mein phul khilte hain

mere uruj ka mehwar hai sadgi meri

wo is liye to meri sadgi se jalte hain