hamare sath mazi ke kai qisse nikal aae

hamāre saath maazī ke ka.ī qisse nikal aa.e

bahut se dost dushman mārne marne nikal aa.e

palaTtā dekh kar manzil ne yuuñ āvāz dī ham ko

purāne rāstoñ meñ se na.e raste nikal aa.e

kiyā thā saaf ham ne rāsta ashjār kaTvā kar

kahāñ se rokne ko rāsta patte nikal aa.e

hamārī niiñd se jab vāpsī mumkin huī yaaro

khulā ham par ki ham to sub.h se aage nikal aa.e

hamāre saath 'jāzib' qāfila niklā thā jo us meñ

bahut se ajnabī the aur kuchh apne nikal aa.e

hamare sath mazi ke kai qisse nikal aae

bahut se dost dushman marne marne nikal aae

palaTta dekh kar manzil ne yun aawaz di hum ko

purane raston mein se nae raste nikal aae

kiya tha saf hum ne rasta ashjar kaTwa kar

kahan se rokne ko rasta patte nikal aae

hamari nind se jab wapsi mumkin hui yaro

khula hum par ki hum to subh se aage nikal aae

hamare sath 'jazib' qafila nikla tha jo us mein

bahut se ajnabi the aur kuchh apne nikal aae