hamare sine ke wast mein aur hi faza hai

hamāre siine ke vast meñ aur hī fazā hai

vahāñ ruteñ aur haiñ jahāñ ḳhatt-e-istavā hai

umiid ko ḳhauf ḳhauf ko khā rahī hai ġhaflat

ġhizā.ī zanjīr kī tarah dil kā silsila hai

hamāre rone pe hañsne lagte haiñ aane vaale

hamārī dīvār-e-girya dīvār-e-qahqaha hai

tamām aalam phirā huuñ pahuñchā kahīñ nahīñ huuñ

pahuñch mirī nā-rasā.iyoñ kī jagah jagah hai

duā nahīñ qaht meñ zahānat hī kaam aa.ī

ye khet masnūī bārishoñ se harā huā hai

kidhar kidhar se bachā.eñ siine kī sho.alagī ko

badan ke chāroñ taraf hī qutbain kī fazā hai

hamārī āh-o-fuġhāñ kisī tak nahīñ pahuñchtī

ḳhalā meñ saut-o-sadā kī tarsīl mas.ala hai

juḌā hī rahtā hai ḳhāksārī se qalb-e-raushan

qamar hamesha zamīn ke gird ghūmtā hai

ye girya hāsil hai imtizāj-e-nishāt-o-ġham kā

asās-o-tezāb ke amal se namak banā hai

maiñ tujh ko maazī meñ jā ke mumkin hai dekh pā.ūñ

bashar tajāzub kī lahr daryāft kar chukā hai

gunah pe aañsū bahā ke huuñ bāġh-bāġh 'shāhid'

mire siyah pāniyoñ meñ sabza ugā huā hai

hamare sine ke wast mein aur hi faza hai

wahan ruten aur hain jahan KHatt-e-istawa hai

umid ko KHauf KHauf ko kha rahi hai ghaflat

ghizai zanjir ki tarah dil ka silsila hai

hamare rone pe hansne lagte hain aane wale

hamari diwar-e-girya diwar-e-qahqaha hai

tamam aalam phira hun pahuncha kahin nahin hun

pahunch meri na-rasaiyon ki jagah jagah hai

dua nahin qaht mein zahanat hi kaam aai

ye khet masnui barishon se hara hua hai

kidhar kidhar se bachaen sine ki shoalagi ko

badan ke chaaron taraf hi qutbain ki faza hai

hamari aah-o-fughan kisi tak nahin pahunchti

KHala mein saut-o-sada ki tarsil masala hai

juDa hi rahta hai KHaksari se qalb-e-raushan

qamar hamesha zamin ke gird ghumta hai

ye girya hasil hai imtizaj-e-nishat-o-gham ka

asas-o-tezab ke amal se namak bana hai

main tujh ko mazi mein ja ke mumkin hai dekh paun

bashar tajazub ki lahr daryaft kar chuka hai

gunah pe aansu baha ke hun bagh-bagh 'shahid'

mere siyah paniyon mein sabza uga hua hai