hamari aankh mein manzar tumhaare raushan hain

hamārī aañkh meñ manzar tumhāre raushan haiñ

ki jaise niile falak par sitāre raushan haiñ

kisī ne aag lagā.ī hai Thahre paanī meñ

sulag rahā hai samundar kināre raushan haiñ

ye saut hai ki 'alāmat hai sham'-e-mahfil kī

ye lafz haiñ ki na.e isti'āre raushan haiñ

sañbhal ke mujh ko qadam rakhnā hoñge duniyā meñ

kināya-kār hai vo aañkh ishāre raushan hai

kahīñ kahīñ to vo lau sar uThāne lagtī hai

kabhī kabhī to ye lagtā hai saare raushan haiñ

kisī ne jhoñk diyā hai badan kī dozaḳh meñ

tamām sho'le tamāmī sharāre raushan haiñ

mujhe jalānā nahīñ paḌtā apnā dil 'zahrāb'

ḳhudā kā shukr hai mere nazāre raushan haiñ

hamari aankh mein manzar tumhaare raushan hain

ki jaise nile falak par sitare raushan hain

kisi ne aag lagai hai Thahre pani mein

sulag raha hai samundar kinare raushan hain

ye saut hai ki 'alamat hai sham'-e-mahfil ki

ye lafz hain ki nae isti'are raushan hain

sanbhal ke mujh ko qadam rakhna honge duniya mein

kinaya-kar hai wo aankh ishaare raushan hai

kahin kahin to wo lau sar uThane lagti hai

kabhi kabhi to ye lagta hai sare raushan hain

kisi ne jhonk diya hai badan ki dozaKH mein

tamam sho'le tamami sharare raushan hain

mujhe jalana nahin paDta apna dil 'zahrab'

KHuda ka shukr hai mere nazare raushan hain