ہماری آنکھوں میں رات بھر اک حسین چہرہ بنا رہے گا

ہماری آنکھوں میں رات بھر اک حسین چہرہ بنا رہے گا

سو تیرگی میں بھی روشنی سے یوں اپنا رشتہ بنا رہے گا

میں داغ دنیا کے سب بھلا دوں مگر مجھے یہ یقیں دلاؤ

کہ میرے اور اس جہان کے بیچ جو ہے پردا بنا رہے گا

عجیب ہے یہ مگر قفس میں بھی مجھ کو اب چین آ رہا ہے

سو اب یہ طے ہے جہان سارا بس اب تمہارا بنا رہے گا

کنارا اے دل نہیں کریں گے جو ڈوبتے ہیں تو ڈوب جائیں

نہیں تھا جو درمیان اپنے وہ ایک وعدہ بنا رہے گا

لگا تھا مرہم اثر کرے گا بھریں گے سارے ہی زخم اک دن

خبر نہیں تھی کہ گھاؤ جیسا تھا ہائے ویسا بنا رہے گا