hamari aankhon mein raat bhar ek hasin chehra bana rahega

hamārī āñkhoñ meñ raat bhar ik hasīn chehra banā rahegā

so tīrgī meñ bhī raushnī se yuuñ apnā rishta banā rahegā

maiñ daaġh duniyā ke sab bhulā duuñ magar mujhe ye yaqīñ dilāo

ki mere aur is jahān ke biich jo hai pardā banā rahegā

'ajīb hai ye magar qafas meñ bhī mujh ko ab chain aa rahā hai

so ab ye tai hai jahān saarā bas ab tumhārā banā rahegā

kinārā ai dil nahīñ kareñge jo Dūbte haiñ to Duub jaa.eñ

nahīñ thā jo darmiyān apne vo ek vā'da banā rahegā

lagā thā marham asar karegā bhareñge saare hī zaḳhm ik din

ḳhabar nahīñ thī ki ghaav jaisā thā haa.e vaisā banā rahegā

hamari aankhon mein raat bhar ek hasin chehra bana rahega

so tirgi mein bhi raushni se yun apna rishta bana rahega

main dagh duniya ke sab bhula dun magar mujhe ye yaqin dilao

ki mere aur is jahan ke bich jo hai parda bana rahega

'ajib hai ye magar qafas mein bhi mujh ko ab chain aa raha hai

so ab ye tai hai jahan sara bas ab tumhaara bana rahega

kinara ai dil nahin karenge jo Dubte hain to Dub jaen

nahin tha jo darmiyan apne wo ek wa'da bana rahega

laga tha marham asar karega bharenge sare hi zaKHm ek din

KHabar nahin thi ki ghaw jaisa tha hae waisa bana rahega