hamari baada-kashi se waqif nahin hai shayad abhi zamana

hamārī bāda-kashī se vāqif nahīñ hai shāyad abhī zamāna

ham ek sāġhar meñ jab bhī chāheñ Dubo ke rakh deñ sharāb-ḳhāna

tumhārī nazar-e-karam kā saaya rahe jo yuuñ mujh pe ġhā.ebāna

maiñ pher duuñ hādsoñ ke ruḳh hī maiñ rok duuñ gardish-e-zamāna

jo tum chalo jhuum uTheñ fazā.eñ ruko to ruk jaa.e nabz-e-ālam

jahāñ tum apnī nazar jhukā do vahīñ Thahar jā.egā zamāna

nigāh-e-maḳhmūr kī vo mastī chhuḌā de rindoñ se mai-parastī

jise nigāhoñ se tum pilā do vo bhuul jaa.e sharāb-ḳhāna

ye husn vaale jafā ke māhir vafā kī taskīn de rahe haiñ

fareb kitnā hai ḳhūbsūrat hasīn hai kis qadar bahāna

abhī to dil meñ tumhārī yādoñ kī mash.aleñ jal rahī haiñ paiham

charāġh-e-dāġh-e-jigar haiñ raushan sajā huā hai ġharīb-ḳhāna

diyā hai jo da.avat-e-nazāra to tāb-e-nazzārgī bhī de do

vagarna ahl-e-jahāñ na dohrā.eñ phir vahī tuur kā fasāna

havā.eñ kuchh garm ho rahī haiñ sab apne dāman bachā.e rakkheñ

kahīñ 'sharar' kī zarā sī laġhzish na phūñk de ye nigār-ḳhāna

hamari baada-kashi se waqif nahin hai shayad abhi zamana

hum ek saghar mein jab bhi chahen Dubo ke rakh den sharab-KHana

tumhaari nazar-e-karam ka saya rahe jo yun mujh pe ghaebana

main pher dun hadson ke ruKH hi main rok dun gardish-e-zamana

jo tum chalo jhum uThen fazaen ruko to ruk jae nabz-e-alam

jahan tum apni nazar jhuka do wahin Thahar jaega zamana

nigah-e-maKHmur ki wo masti chhuDa de rindon se mai-parasti

jise nigahon se tum pila do wo bhul jae sharab-KHana

ye husn wale jafa ke mahir wafa ki taskin de rahe hain

fareb kitna hai KHubsurat hasin hai kis qadar bahana

abhi to dil mein tumhaari yaadon ki mashalen jal rahi hain paiham

charagh-e-dagh-e-jigar hain raushan saja hua hai gharib-KHana

diya hai jo dawat-e-nazara to tab-e-nazzargi bhi de do

wagarna ahl-e-jahan na dohraen phir wahi tur ka fasana

hawaen kuchh garm ho rahi hain sab apne daman bachae rakkhen

kahin 'sharar' ki zara si laghzish na phunk de ye nigar-KHana