hamari baat mein sun dam ka ramz haiga kya

hamārī baat meñ sun dam kā ramz haigā kyā

kisī bhī pech kisī ḳham kā ramz haigā kyā

vo daur aur thā jab tum ne mujh se pūchhā thā

mohabbatoñ meñ kahīñ ġham kā ramz haigā kyā

ye āb-e-sāda ye āb-e-ravāñ ye āb-e-azal

is āb-e-nāb meñ zamzam kā ramz haigā kyā

falak pe abr bhī anjum bhī abr-e-bārāñ bhī

magar zamīñ pe jhamā-jham kā ramz haigā kyā

na koī tishna-labī hai na koī sairābī

to mere jaam tire jam kā ramz haigā kyā

usī ke dam se baqā hai usī ke dam se fanā

fanā-baqā meñ batā dam kā ramz haigā kyā

'anīs' raqs meñ tum ho ki raqs hai tum meñ

ki āḳhirash ye damādam kā ramz haigā kyā

hamari baat mein sun dam ka ramz haiga kya

kisi bhi pech kisi KHam ka ramz haiga kya

wo daur aur tha jab tum ne mujh se puchha tha

mohabbaton mein kahin gham ka ramz haiga kya

ye aab-e-sada ye aab-e-rawan ye aab-e-azal

is aab-e-nab mein zamzam ka ramz haiga kya

falak pe abr bhi anjum bhi abr-e-baran bhi

magar zamin pe jhama-jham ka ramz haiga kya

na koi tishna-labi hai na koi sairabi

to mere jam tere jam ka ramz haiga kya

usi ke dam se baqa hai usi ke dam se fana

fana-baqa mein bata dam ka ramz haiga kya

'anis' raqs mein tum ho ki raqs hai tum mein

ki aaKHirash ye damadam ka ramz haiga kya