hamari bechaini uski palken bhigo gai hai

hamārī bechainī us kī palkeñ bhigo ga.ī hai

ye raat yuuñ ban rahī hai jaise ki so ga.ī hai

diye the kaalī ghaTā ko ham ne udhār aañsū

kise kaheñ ab ki saarī pūñjī Dubo ga.ī hai

ham us kī ḳhātir bachā na pā.eñge umr apnī

fuzūl-ḳharchī kī ham ko aadat sī ho ga.ī hai

vo ek sāhil ki jis pe tum ḳhud ko DhūñDte ho

vahīñ pe ik shaam mere hisse kī kho ga.ī hai

maiñ yuuñ hī mohre baḌhā rahā huuñ jhijak jhijak kar

ḳhabar use bhī hai baazī vo haar to ga.ī hai

hamari bechaini us ki palken bhigo gai hai

ye raat yun ban rahi hai jaise ki so gai hai

diye the kali ghaTa ko hum ne udhaar aansu

kise kahen ab ki sari punji Dubo gai hai

hum us ki KHatir bacha na paenge umr apni

fuzul-KHarchi ki hum ko aadat si ho gai hai

wo ek sahil ki jis pe tum KHud ko DhunDte ho

wahin pe ek sham mere hisse ki kho gai hai

main yun hi mohre baDha raha hun jhijak jhijak kar

KHabar use bhi hai bazi wo haar to gai hai