hamari chhat pe bhi suraj ka intizam hua

hamārī chhat pe bhī sūraj kā intizām huā

ye aur baat ki ye kaam vaqt-e-shām huā

uThe raqīb to phir mujh se baiThne ko kahā

tumhārī bazm meñ yuuñ merā ehtirām huā

safar meñ tum se kināra kiyā tumhāre liye

magar bichhaḌne kā afsos gaam gaam huā

ki jaise DaañT de koī yatīm bachche ko

hamārī hasrat-e-dil kā yuuñ iḳhtitām huā

hamāre dil ko dikhā.ī ga.ī na.ī duniyā

kuchh is tarah ye parinda bhī zer-e-dām huā

bichhaḌ ke tujh se hunar shā'irī kā siikh liyā

yuuñ ahl-e-dard ke jiine kā intizām huā

hamari chhat pe bhi suraj ka intizam hua

ye aur baat ki ye kaam waqt-e-sham hua

uThe raqib to phir mujh se baiThne ko kaha

tumhaari bazm mein yun mera ehtiram hua

safar mein tum se kinara kiya tumhaare liye

magar bichhaDne ka afsos gam gam hua

ki jaise DanT de koi yatim bachche ko

hamari hasrat-e-dil ka yun iKHtitam hua

hamare dil ko dikhai gai nai duniya

kuchh is tarah ye parinda bhi zer-e-dam hua

bichhaD ke tujh se hunar sha'iri ka sikh liya

yun ahl-e-dard ke jine ka intizam hua