hamari KHak-e-afsurda sar-e-ku-e-butan rakh di

hamārī ḳhāk-e-afsurda sar-e-kū-e-butāñ rakh dī

kahāñ kī chiiz thī tū ne kahāñ ai āsmāñ rakh dī

sitam hai kaaT kar shāḳh-e-nasheman bāġhbāñ rakh dī

miTā kar tū ne buniyād-e-bahār-e-gulsitāñ rakh dī

na sahrā meñ nishāñ apnā na gulshan meñ patā apnā

chhupā kar musht-e-ḳhāk apnī ye vahshat ne kahāñ rakh dī

guloñ ke saath kāñTe bhī lagā.e jis ne siine se

usī Daalī pe gulshan meñ binā-e-āshiyāñ rakh dī

nidā aa.ī ki har sajda yahāñ maqbūl hotā hai

ḳhudā jaane mohabbat meñ jabīñ ham ne kahāñ rakh dī

ḳhayāloñ meñ samā kar guftugū karne lagī ham se

'musavvir' ne tirī tasvīr ke muñh meñ zabāñ rakh dī

hamari KHak-e-afsurda sar-e-ku-e-butan rakh di

kahan ki chiz thi tu ne kahan ai aasman rakh di

sitam hai kaT kar shaKH-e-nasheman baghban rakh di

miTa kar tu ne buniyaad-e-bahaar-e-gulsitan rakh di

na sahra mein nishan apna na gulshan mein pata apna

chhupa kar musht-e-KHak apni ye wahshat ne kahan rakh di

gulon ke sath kanTe bhi lagae jis ne sine se

usi Dali pe gulshan mein bina-e-ashiyan rakh di

nida aai ki har sajda yahan maqbul hota hai

KHuda jaane mohabbat mein jabin hum ne kahan rakh di

KHayalon mein sama kar guftugu karne lagi hum se

'musawwir' ne teri taswir ke munh mein zaban rakh di