hamari mahfilon mein be-hijab aane se kya hoga

hamārī mahfiloñ meñ be-hijāb aane se kyā hogā

nahīñ jab hosh meñ ham jalva farmāne se kyā hogā

junūñ ke saath thoḌī sī fazā-e-lā-makāñ bhī de

mirī vahshat ko is duniyā ke vīrāne se kyā hogā

hai mar jaanā kalīd-e-fat.h samjhāyā thā rindoñ ne

magar nāseh ye kahtā hai ki mar jaane se kyā hogā

zahe qismat agar hazrat ḳhud apnā jā.eza bhī leñ

hamārī zindagī par tiir barsāne se kyā hogā

agar hamdard bante ho to zanjīreñ zarā kholo

mirī pā-bastagī par yūñhī ġham khāne se kyā hogā

dar-e-pīr-e-muġhāñ chhoḌeñ ye ham se ho nahīñ saktā

koī vaa.iz se kah do tere bahkāne se kyā hogā

jise dekho vo hai sarmast-e-sahbā-e-ḳhirad yaksar

ḳhudāvandā! yahāñ ik tere dīvāne se kyā hogā

nahīñ qalb o jigar meñ ḳhuun kā qatra koī baaqī

azīzo ab hamāre hosh meñ aane se kyā hogā

dukhoñ ko kho nahīñ sakte agar ahl-e-ḳhirad 'arshī'

to ḳhālī sīna-e-aflāk barmāne se kyā hogā

hamari mahfilon mein be-hijab aane se kya hoga

nahin jab hosh mein hum jalwa farmane se kya hoga

junun ke sath thoDi si faza-e-la-makan bhi de

meri wahshat ko is duniya ke virane se kya hoga

hai mar jaana kalid-e-fath samjhaya tha rindon ne

magar naseh ye kahta hai ki mar jaane se kya hoga

zahe qismat agar hazrat KHud apna jaeza bhi len

hamari zindagi par tir barsane se kya hoga

agar hamdard bante ho to zanjiren zara kholo

meri pa-bastagi par yunhi gham khane se kya hoga

dar-e-pir-e-mughan chhoDen ye hum se ho nahin sakta

koi waiz se kah do tere bahkane se kya hoga

jise dekho wo hai sarmast-e-sahba-e-KHirad yaksar

KHudawanda! yahan ek tere diwane se kya hoga

nahin qalb o jigar mein KHun ka qatra koi baqi

azizo ab hamare hosh mein aane se kya hoga

dukhon ko kho nahin sakte agar ahl-e-KHirad 'arshi'

to KHali sina-e-aflak barmane se kya hoga