hamari pyas afsana bani hai

hamārī pyaas afsāna banī hai

yahī mauzūa-e-mai-ḳhāna banī hai

hamāre dil kī hālat kaun jaane

hamārī vaz.a shāhāna banī hai

mohabbat ne bhare dil meñ vo sho.ale

zarā sī ḳhaak parvāna banī hai

luTā dī jis pe duniyā vo nazar bhī

hamāre ġham se begāna banī hai

isī duniyā ke ik goshe meñ yā-rab

mirī duniyā judāgāna banī hai

khanaktī gūñjtī tanhā.iyoñ se

hamārī shab parī-ḳhāna banī hai

na pahchānoge tum ye dil kī bastī

tumhāre ba.ad vīrāna banī hai

mohabbat ne diye haiñ ham ko aañsū

yahī do buuñd nazrāna banī hai

ḳhatā kyā ho ga.ī 'masrūr' ham se

ki har har saañs jurmāna banī hai

hamari pyas afsana bani hai

yahi mauzua-e-mai-KHana bani hai

hamare dil ki haalat kaun jaane

hamari waza shahana bani hai

mohabbat ne bhare dil mein wo shoale

zara si KHak parwana bani hai

luTa di jis pe duniya wo nazar bhi

hamare gham se begana bani hai

isi duniya ke ek goshe mein ya-rab

meri duniya judagana bani hai

khanakti gunjti tanhaiyon se

hamari shab pari-KHana bani hai

na pahchanoge tum ye dil ki basti

tumhaare baad virana bani hai

mohabbat ne diye hain hum ko aansu

yahi do bund nazrana bani hai

KHata kya ho gai 'masrur' hum se

ki har har sans jurmana bani hai