hamdam nahin shafiq nahin chaaragar nahin

hamdam nahīñ shafīq nahīñ chārāgar nahīñ

ab jī ke kyā kareñge koī ham-safar nahīñ

likhnā hai naama un ko magar kis tarah likheñ

baaqī ab ek qatra-e-ḳhūn-e-jigar nahīñ

har shaḳhs mast-o-be-ḳhud-o-sarshār hai vahāñ

us bazm meñ kisī ko kisī kī ḳhabar nahīñ

kyā jaane us nigāh ne kyā sehr kar diyā

ab apne iḳhtiyār meñ apnī nazar nahīñ

un ke har ik ishāre pe jhuktā hai apnā sar

un kā ye haal hai ki har ik baat par nahīñ

in zulmatoñ se barsar-e-paikār kab talak

shāyad mire nasīb meñ nūr-e-sahar nahīñ

rah rah ke dil meñ hotī hai ai 'dard' ik ḳhalish

ye aur kyā hai dard-e-mohabbat agar nahīñ

hamdam nahin shafiq nahin chaaragar nahin

ab ji ke kya karenge koi ham-safar nahin

likhna hai nama un ko magar kis tarah likhen

baqi ab ek qatra-e-KHun-e-jigar nahin

har shaKHs mast-o-be-KHud-o-sarshaar hai wahan

us bazm mein kisi ko kisi ki KHabar nahin

kya jaane us nigah ne kya sehr kar diya

ab apne iKHtiyar mein apni nazar nahin

un ke har ek ishaare pe jhukta hai apna sar

un ka ye haal hai ki har ek baat par nahin

in zulmaton se barsar-e-paikar kab talak

shayad mere nasib mein nur-e-sahar nahin

rah rah ke dil mein hoti hai ai 'dard' ek KHalish

ye aur kya hai dard-e-mohabbat agar nahin