hamdard mere kitne nirale hain azizo

hamdard mire kitne nirāle haiñ azīzo

mere liye ye paañv ke chhāle haiñ azīzo

siine pe sināñ hoñToñ pe taale haiñ azīzo

is haal meñ jo ḳhush haiñ jiyāle haiñ azīzo

duniyā meñ muqaddar ke dhanī haiñ to vahī haiñ

kuchh log jinheñ chāhne vaale haiñ azīzo

aġhyār ko mauqa to diyā hī na unhoñ ne

ab tak to ham apnoñ ke nivāle haiñ azīzo

kuchh yuuñ hī nahīñ a.alā dimāġhoñ kī upaj haiñ

duniyā-e-adab meñ jo risāle haiñ azīzo

ham gardish-e-hālāt meñ phañste hī ga.e haiñ

har samt musībat hī ke jaale haiñ azīzo

ye jang nahīñ ma.arka-e-karb-o-balā hai

hamrāh na lashkar na risāle haiñ azīzo

barjasta kuchh aise haiñ ki ghar kar ga.e dil meñ

ash.ār vo 'ahsan' ne nikāle haiñ azīzo

hamdard mere kitne nirale hain azizo

mere liye ye panw ke chhaale hain azizo

sine pe sinan honTon pe tale hain azizo

is haal mein jo KHush hain jiyale hain azizo

duniya mein muqaddar ke dhani hain to wahi hain

kuchh log jinhen chahne wale hain azizo

aghyar ko mauqa to diya hi na unhon ne

ab tak to hum apnon ke niwale hain azizo

kuchh yun hi nahin aala dimaghon ki upaj hain

duniya-e-adab mein jo risale hain azizo

hum gardish-e-haalat mein phanste hi gae hain

har samt musibat hi ke jale hain azizo

ye jang nahin marka-e-karb-o-bala hai

hamrah na lashkar na risale hain azizo

barjasta kuchh aise hain ki ghar kar gae dil mein

ashaar wo 'ahsan' ne nikale hain azizo