hamdardi ki zara bhi zarurat nahin mujhe

hamdardī kī zarā bhī zarūrat nahīñ mujhe

ehsāñ koī uThāne kī aadat nahīñ mujhe

haañ lālchī huuñ aur ziyāda kī hai havas

itne qalīl par to qanā.at nahīñ mujhe

darkār thī jo chiiz vo nā-paid ho chukī

vāfir vahī hai jis kī zarūrat nahīñ mujhe

sab kuchh bigāḌ ke hī na rakh duuñ kise ḳhabar

is kaam meñ zarā bhī mahārat nahīñ mujhe

vo baat bas umūmī ravayyoñ ke baare thī

tum se vagarna koī shikāyat nahīñ mujhe

tum hote ho to lagtā hai sab kuchh bharā bharā

jaise kisī bhī chiiz kī qillat nahīñ mujhe

ik raa.e ma.e-dalīl yahāñ pesh karnī hai

maqsūd varna apnī vakālat nahīñ mujhe

ārām hī meñ itnā maiñ mashġhūl huuñ ki ab

aise fuzūl kāmoñ kī fursat nahīñ mujhe

andar to ḳhair duur ki filhāl idhar kahīñ

bāhar bhī baiThne kī ijāzat nahīñ mujhe

har kaam kartā huuñ baḌe ārām se maiñ 'gul'

aur is muāmle meñ to ujlat nahīñ mujhe

hamdardi ki zara bhi zarurat nahin mujhe

ehsan koi uThane ki aadat nahin mujhe

han lalchi hun aur ziyaada ki hai hawas

itne qalil par to qanaat nahin mujhe

darkar thi jo chiz wo na-paid ho chuki

wafir wahi hai jis ki zarurat nahin mujhe

sab kuchh bigaD ke hi na rakh dun kise KHabar

is kaam mein zara bhi mahaarat nahin mujhe

wo baat bas umumi rawayyon ke bare thi

tum se wagarna koi shikayat nahin mujhe

tum hote ho to lagta hai sab kuchh bhara bhara

jaise kisi bhi chiz ki qillat nahin mujhe

ek rae mae-dalil yahan pesh karni hai

maqsud warna apni wakalat nahin mujhe

aaram hi mein itna main mashghul hun ki ab

aise fuzul kaamon ki fursat nahin mujhe

andar to KHair dur ki filhaal idhar kahin

bahar bhi baiThne ki ijazat nahin mujhe

har kaam karta hun baDe aaram se main 'gul'

aur is muamle mein to ujlat nahin mujhe