hamdardiyan kisi se kisi se dua mili

hamdardiyāñ kisī se kisī se duā milī

yā-rab sila milā hai mujhe yā sazā milī

us aadmī ko jāniye sab kuchh hī mil gayā

jis aadmī ko daulat-e-sharm-o-hayā milī

kuchh logoñ kī shikāyateñ hoñgī bajā magar

ham ko to dostī meñ hamesha vafā milī

pī jaa.eñ ḳhum ke ḳhum hī jo pīr-e-muġhāñ unheñ

paimānoñ meñ sharāb milī bhī to kyā milī

uḌne se rok leñ mirī kamzoriyāñ mujhe

be-shak hazār baar muāfiq havā milī

kis kaam kā vo aadmī is daur meñ jiye

andāz-e-sūfiyāna nazar pārsā milī

vo shaḳhs mo'atabar huā ajmer jo gayā

nadiyā huī nihāl jo gangā meñ jā milī

'parvāz' ḳhush-nasīb hai vo aadmī jise

rahbar milā durust nasīhat bajā milī

hamdardiyan kisi se kisi se dua mili

ya-rab sila mila hai mujhe ya saza mili

us aadmi ko jaaniye sab kuchh hi mil gaya

jis aadmi ko daulat-e-sharm-o-haya mili

kuchh logon ki shikayaten hongi baja magar

hum ko to dosti mein hamesha wafa mili

pi jaen KHum ke KHum hi jo pir-e-mughan unhen

paimanon mein sharab mili bhi to kya mili

uDne se rok len meri kamzoriyan mujhe

be-shak hazar bar muafiq hawa mili

kis kaam ka wo aadmi is daur mein jiye

andaz-e-sufiyana nazar parsa mili

wo shaKHs mo'atabar hua ajmer jo gaya

nadiya hui nihaal jo ganga mein ja mili

'parwaz' KHush-nasib hai wo aadmi jise

rahbar mila durust nasihat baja mili