hamein aaj tak ajnabi jaante hain

hameñ aaj tak ajnabī jānte haiñ

vo jin ko ham apnā valī jānte haiñ

nahīñ hai jinheñ kuchh patā zarf kyā hai

samundar ko bhī vo nadī jānte haiñ

jo haiñ mohtasib ḳhud hī apne 'amal ke

vahī log apnī ḳhudī jānte haiñ

tasanno' takabbur se jo bhī bachā hai

use ham bhalā aadmī jānte haiñ

hai amn-o-sukūñ bas unhīñ kā muqaddar

jo duniyā ko ik 'ārzī jānte haiñ

milā kartī hai us ko ik roz manzil

jo apnī hī saarī kamī jānte haiñ

zabāñ par sadā haq hī rakhte haiñ 'rahbar'

ḳhamoshī ko ham bebasī jānte haiñ

hamein aaj tak ajnabi jaante hain

wo jin ko hum apna wali jaante hain

nahin hai jinhen kuchh pata zarf kya hai

samundar ko bhi wo nadi jaante hain

jo hain mohtasib KHud hi apne 'amal ke

wahi log apni KHudi jaante hain

tasanno' takabbur se jo bhi bacha hai

use hum bhala aadmi jaante hain

hai amn-o-sukun bas unhin ka muqaddar

jo duniya ko ek 'arzi jaante hain

mila karti hai us ko ek roz manzil

jo apni hi sari kami jaante hain

zaban par sada haq hi rakhte hain 'rahbar'

KHamoshi ko hum bebasi jaante hain