ہمیں آج تک اجنبی جانتے ہیں

ہمیں آج تک اجنبی جانتے ہیں

وہ جن کو ہم اپنا ولی جانتے ہیں

نہیں ہے جنہیں کچھ پتا ظرف کیا ہے

سمندر کو بھی وہ ندی جانتے ہیں

جو ہیں محتسب خود ہی اپنے عمل کے

وہی لوگ اپنی خودی جانتے ہیں

تصنع تکبر سے جو بھی بچا ہے

اسے ہم بھلا آدمی جانتے ہیں

ہے امن و سکوں بس انہیں کا مقدر

جو دنیا کو اک عارضی جانتے ہیں

ملا کرتی ہے اس کو اک روز منزل

جو اپنی ہی ساری کمی جانتے ہیں

زباں پر سدا حق ہی رکھتے ہیں رہبرؔ

خموشی کو ہم بے بسی جانتے ہیں