hamein apne to kya ghairon ko Thukrana nahin aata

hameñ apne to kyā ġhairoñ ko Thukrānā nahīñ aatā

ravādārī kī rāhoñ se bhaTak jaanā nahīñ aatā

diyā ummīd kā rahbar banā letā huuñ manzil tak

mujhe raste kī tārīkī se ghabrānā nahīñ aatā

gulistān-e-mohabbat meñ kuchh aise phuul khilte haiñ

jinheñ mausam badalne par bhī murjhānā nahīñ aatā

jahāñ tak ho sake har haal meñ ham shaad rahte haiñ

vafūr-e-yās meñ bhī ashk barsānā nahīñ aatā

rah-e-manzil hamārī hausla-mandī se vāqif hai

hameñ baḌhnā to aatā hai palaT aanā nahīñ aatā

ḳhudā-e-do-jahāñ ne ye salāhiyyat hameñ dī hai

kabhī makr-o-riyā kā jaal phailānā nahīñ aatā

milā sabr-o-qanā.at kā asāsa mālik-e-kul se

ye ne.amat hai hameñ ne.amat pe itrānā nahīñ aatā

tahī-kāsa liye vāpas khañDar meñ lauT aa.e haiñ

hameñ ehsās-e-mahrūmī ko bhaḌkānā nahīñ aatā

thapeḌe yās-o-ġham ke khaa.e haiñ din-rāt ai 'gauhar'

magar ab tak fareb-e-ārzū khānā nahīñ aatā

hamein apne to kya ghairon ko Thukrana nahin aata

rawadari ki rahon se bhaTak jaana nahin aata

diya ummid ka rahbar bana leta hun manzil tak

mujhe raste ki tariki se ghabrana nahin aata

gulistan-e-mohabbat mein kuchh aise phul khilte hain

jinhen mausam badalne par bhi murjhana nahin aata

jahan tak ho sake har haal mein hum shad rahte hain

wafur-e-yas mein bhi ashk barsana nahin aata

rah-e-manzil hamari hausla-mandi se waqif hai

hamein baDhna to aata hai palaT aana nahin aata

KHuda-e-do-jahan ne ye salahiyyat hamein di hai

kabhi makr-o-riya ka jal phailana nahin aata

mila sabr-o-qanaat ka asasa malik-e-kul se

ye neamat hai hamein neamat pe itrana nahin aata

tahi-kasa liye wapas khanDar mein lauT aae hain

hamein ehsas-e-mahrumi ko bhaDkana nahin aata

thapeDe yas-o-gham ke khae hain din-raat ai 'gauhar'

magar ab tak fareb-e-arzu khana nahin aata